विराटनगर ११ चैत । विराटनगरमे शुक्रबारदिनसँ सुरू भेल मिल्स गोल्डकप फुटबल प्रतियोगितामें धरानके गोधुली फुटबल क्लब विजयी भक सेमिफाइनलमें प्रवेश कएने अछि ।
मिल्स गोल्डकप फुटबल ट्रष्टके आयोजनामें विराटनगरस्थित जुट मिलके खेल मैदानमें सुरू भेल प्रतियोगिताके उद्घाटन खेलमें उर्लाबारी एगारह मोरङके ‘सडन डेथ’ में ७–६ गोलसँ हरबैत धरान सेमिफाइनलमें पहुँचल अछि । निर्धारित समयधरि गोल रहित बराबर भेलापर खेल टाइब्रेकरमें गेल छल ।
धरानके नतिजाकेलेल सडन डेथतक संघर्ष करएपरल । टाइब्रेकरमें सेहो दुनू टोली ५–५ गोलके बराबरी कएलापर नतिजा सडन डेथसँ निकाललगेल छल । सडन डेथमें धरानके दोर्जे तामाङ्ग, मिलन राई, मनोज राई, हेमन्त थापा मगर, दिवस सुनवार, जीवन गुरूङ आ कपन कार्की विजयी गोल कएलनि ।
दोसर हाफतक आक्रमक खेल्निहार धरान एक दर्जन गोलके अवसर गुमएलापर जितलेल सडन डेथमें प्रतिस्पर्धा कएने छल । खेलके म्यान अफ द म्याच धरानके गोल किपर किशोर गिरी घोषित भेलनि ।
शनिबारके खेल एन्फा एकेडेमी धरान सुनसरी आ दमक एकेडेमी झापा बिच प्रतिस्पर्धा होएत । प्रतियोगिताके उद्घाटन एन्फाके अध्यक्ष कर्माछिरिङ शेर्पा कएने छलथि ।
