विराटनगरमा सम्पन्न कोशी प्रदेशस्तरीय पुरुष भलिबल प्रतियोगिताको उपाधि झापाको बिर्तामोडस्थित निधि सेकेन्डरी स्कुलले जितेको छ।
विराट खेलकुद क्लब, विराटनगरको आयोजनामा भूमिप्रशासन चोकस्थित विराट खेलकुद भलिबल प्रशिक्षण केन्द्र परिसरमा भएको फाइनल भिडन्तमा निधि सेकेन्डरी स्कुलले कान्तिपुर कलेज, विराटनगरलाई पराजित गर्दै उपाधि हात पारेको हो।
रोमाञ्चक बनेको फाइनल खेलमा निधि सेकेन्डरी स्कुलले कान्तिपुर कलेजमाथि लगातार तीन सेटमा जित निकाल्दै ३–० को सोझो सेटमा खेल आफ्नो पक्षमा पार्यो।
गत साउन ७ गतेदेखि सुरु भएको उक्त प्रतियोगितामा कोशी प्रदेशका उच्च माध्यमिक विद्यालय तथा कलेजका १२ वटा टोलीहरूको सहभागिता रहेको थियो।
प्रतियोगितामा प्रथम हुने निधि सेकेन्डरी स्कुलले २० हजार रुपैयाँ नगदसहित ट्रफी, मेडल र प्रमाणपत्र प्राप्त गरेको छ भने उपविजेता बनेको कान्तिपुर कलेजले १० हजार रुपैयाँ नगद, ट्रफी, मेडल र प्रमाणपत्रमा चित्त बुझाएको छ।
विजेता तथा उपविजेता टोलीका खेलाडीहरूलाई आयोजक विराट खेलकुद क्लबका अध्यक्ष मोहम्मद नसरुल र विराटनगर वडा नं. १० का वडाध्यक्ष अर्जुन गिरीले संयुक्त रूपमा पुरस्कार तथा प्रमाणपत्र वितरण गर्नुभएको थियो।
कार्यक्रममा विराट खेलकुद क्लबका सचिव वीरेन्द्रप्रसाद चौधरी लगायत स्थानीय खेलप्रेमी र दर्शकहरूको बाक्लो उपस्थिति रहेको थियो।
