विराटनगर १५ ज्येष्ठ । ओमकार परिवार भित्रका तीन प्रमुख धर्मगुरुहरू विराटनगर आउने भएका छन् । आगामी असार ६ गते विराटनगरमा आयोजना हुन लागेको ‘सनातन सम्मेलन’ मा सहभागी हुन हिन्दू, किराँत र बौद्ध धर्मका शीर्ष गुरुहरू यहाँ आउन लागेका हुन् ।
सम्मेलनलाई भव्य रूपमा सम्पन्न गर्न डा. भेषप्रसाद धमलाको संयोजकत्वमा ३७ सदस्यीय ‘सनातन सम्मेलन’ मूल आयोजक समिति’ गठन गरिएको छ ।
यसैबीच, सम्मेलनलाई व्यवस्थित बनाउन आवश्यक सहयोग र सुझाव सङ्कलन गर्ने उद्देश्यले हिन्दू स्वयंसेवक संघ विराटनगर महानगर समितिले शुक्रबार विभिन्न जातीय समुदायका प्रतिनिधिहरूको सहभागितामा एक कार्यक्रमको आयोजना गरेको छ । कार्यक्रममा महानगरका संघचालक डा. बालकृष्ण साहले सम्पूर्ण सनातनीहरूको सामूहिक अपनत्व र सहयोगमा यो ऐतिहासिक कार्यक्रम गर्न लागिएको बताउनुभयो ।
सम्मेलनमा जुना अखाडाका आचार्य महामण्डलेश्वर स्वामी अवधेशानन्द गिरी महाराज, किराँत धर्मका प्रमुख गुरु एवं फाल्गुनन्दका अवतारका रूपमा सम्मानित महिङ्गुम अङ्सीमाङ आत्मानन्द लिङ्देन सेइङ तथा अन्तर्राष्ट्रिय बौद्ध महासंघ नेपाल च्याप्टरका अध्यक्ष फुपु छेम्बे शेर्पा थुप्तेन जिग्दोलको विशेष सहभागिता रहने आयोजकले जनाएको छ ।
कार्यक्रममा बोल्दै मूल आयोजक समितिका प्रचार–प्रसार प्रमुख एवं पूर्व मन्त्री जयराम यादवले यसअघि नेपालमा विभिन्न समयमा सनातन धर्मका शंकराचार्यहरू आएको भए तापनि जुनागढका मठाधीश पहिलोपटक आउन लागेकाले यो सम्मेलन विशेष महत्वको हुने उल्लेख गर्नुभयो । स्वामी अवधेशानन्द गिरीको विराटनगर आगमनले धार्मिक पर्यटन र सद्भावका हिसाबले विश्वभर सकारात्मक सन्देश प्रवाह गर्ने उहाँको भनाइ थियो ।
त्यस्तै, हिन्दू स्वयंसेवक संघका प्रदेश संघचालक सियाराम रौनियारले सन्त र शास्त्र सदैव मानव जीवनका सच्चा मार्गदर्शक हुने भएकाले यस कार्यक्रमबाट समग्र समाज र समुदाय लाभान्वित हुने विश्वास व्यक्त गर्नुभयो । आचार्य महामण्डलेश्वर स्वामी अवधेशानन्द गिरी विराटनगर आउने क्रममा विराटनगरको नापी कार्यालय नजिकै करिब ३ करोड रुपैयाँको लागतमा निर्माण गरिएको भवनको समेत उद्घाटन गरिने कार्यक्रम रहेको जनाईएको छ ।
सुझाव सङ्कलन कार्यक्रमका वक्ताहरूले प्रविधिको अधिकतम उपयोग गर्दै सामाजिक सञ्जालमार्फत जनमानसमा सम्मेलनको व्यापक प्रचार–प्रसार गर्न सुझाव दिएका छन् । विराटनगर–१ स्थित जिल्ला प्रहरी कार्यालय नजिकै रहेको खाली चौरमा असार ६ गते सनातन सम्मेलन हुने जनाईएको छ ।
कार्यक्रममा हिन्दू स्वयंसेवक संघका राष्ट्रिय सह–कार्यवाहक महेन्द्र प्रसाद साह र ‘सनातन सम्मेलन’ मूल आयोजक समितिका सह–संयोजक सियाराम रौनियार लगायतले बोल्नुभयो ।
