जहदा । मोरङको जहदा गाउँपालिकामा ऋषिदेव समुदायका कुलदेउता बाबा दिना–भद्रीको मन्दिर निर्माण गरिएको छ ।

सो गाउँपालिकाको वडानम्बर ३ मा निर्माण गरिएको मन्दिरको प्रदेश एकका स्वास्थ्यमन्त्री जयराम यादव र गाउँपालिका अध्यक्ष जितेन्द्र साहले उद्घाटन गर्नुभयो । दिना–भद्रीलाई ऋषिदेव समुदायले आफ्ना कुल देउताकोरुपमा पुजा गर्छन ।

मन्त्री यादवको संसदीय विकास कोषबाट बिनियोजित ९ लाख र जहदा ३ नम्बर वडा कार्यालयको ५ लाखगरि १४ लाखको लागतमा मन्दिर निर्माण गरिएको वडाध्यक्ष अनिलकुमार ठाकुरले जानकारी दिनुभयो । स्थानिय पंचिदास ऋषिदेवले दान दिनुभएको ७ धुर जग्गामा मन्दिर निर्माण गरिएको उहाँले जानकारी दिनुभयो ।

जहदा–३ मा ऋषिदेव समुदायको झण्डै ३ सय घर धुरीको बसोबास छ । यद्यपि सो वडामा यस अघिसम्म दिना–भद्रीको मन्दिर निर्माण हुन सकेको थिएन । जहदा ३ मा मात्र नभई सिंगो गाउँपालिकामा कंक्रिटबाट निर्माण गरिएको सो मन्दिर नै पहिलो दिना–भद्री मन्दिर भएको वडाध्यक्ष ठाकुरले दाबी गर्नुभएको छ ।

सो अवसरमा बोल्नुहुँदै मन्त्री यादवले आफ्नो संस्कृति संरक्षणगर्न ऋषिदेव समुदाय थप सजग हुनुपर्ने बताउनुभयो । उहाँले ऋषिदेव समुदाय गरिबि र अशिक्षा लगायतको कारणले पछि परेकाले बालबच्चाको शिक्षामा जोड दिनुपर्ने बताउनुभयो ।

कार्यक्रमकाबीच मन्त्री यादवले जग्गा दाता पंचिदास ऋषिदेवलाई खादा सहित सम्मान गर्नुभयो ।

सम्बन्धित खबरहरु