विराटनगर, २४ पुस । मैथिली कथा साहित्यका विशिष्ट हस्ताक्षर एवं वरिष्ठ साहित्यकार रा.ना. (रामनारायण) सुधाकरको ७९ वर्षको उमेरमा निधन भएको छ । विराटनगर–१४, भगवतीटोलस्थित आफ्नै निवासमा बुधबार (२३ पुस / ७ जनवरी) दिउँसो ३ बजे उहाँको निधन भएको पारिवारिक स्रोतले जनाएको छ ।
लामो समयदेखि श्वासप्रश्वास र अन्य दीर्घरोगबाट पीडित सुधाकरको जन्म विक्रम संवत् २००२ सालमा बाराको कलैया, मल्हनीमा भएको थियो । उहाँका तीन छोरा र एक छोरी हुनुहुन्छ ।
साहित्यिक योगदान र ‘दीयरि’
सुधाकर मैथिली साहित्यमा कथा, कविता, गीत र गजल विधाका अग्रणी व्यक्तित्व मानिनुहुन्छ । उहाँद्वारा लिखित प्रसिद्ध दीर्घकथा ‘दीयरि’ त्रिभुवन विश्वविद्यालयको मैथिली संकाय (स्नातकोत्तर तह) को पाठ्यक्रममा समेत समावेश छ ।
विगत ५ दशकभन्दा लामो समयदेखि साहित्य साधनामा सक्रिय उहाँका सयौँ रचनाहरू नेपाल र भारतका प्रतिष्ठित पत्रपत्रिकाहरूमा प्रकाशित छन् । उहाँको पहिलो कथा संग्रहको रूपमा २०७९ सालमा विराटनगरस्थित मिथिलेश्वरी मिडिया प्रा.लि. ले ‘दीयरि’ कथा संग्रह प्रकाशन गरेको थियो । उक्त संग्रहमा शीर्षक कथासहित २० वटा लामा कथाहरू समेटिएका छन् ।
मिथिलेश्वरी मिडियाका अध्यक्ष नवीन कर्णका अनुसार, सुधाकरको मौलिक कथा शिल्प र विशिष्टतालाई सम्मान गर्दै संस्थाले उहाँको पहिलो पुस्तक प्रकाशनमा ल्याएको थियो ।
पुरस्कार र सम्मान
साहित्यकार सुधाकरले आफ्नो जीवनकालमा विभिन्न प्रतिष्ठित पुरस्कार र सम्मानहरू प्राप्त गर्नुभएको थियो :
-
नेपाल विद्यापति मैथिली पाण्डुलिपि पुरस्कार (२०६९)
-
आठौँ अन्तर्राष्ट्रिय मैथिली सम्मेलन सम्मान (२०५७)
-
मैथिली विकास अभियान सम्मान (२०६१)
-
श्याम–कला मैथिली सेवा पुरस्कार (२०६८)
-
सामाजिक महिला उत्थान समूह सम्मान (२०६९)
-
कोशी प्रदेश सामाजिक विकास मन्त्रालय सम्मान (२०७६)
अप्रकाशित कृतिहरू
सुधाकरका धेरै कृतिहरू अझै प्रकाशनको पर्खाइमा छन् । उहाँका अप्रकाशित कृतिहरूमा :
-
कविता संग्रह: ‘अच्छत’, ‘धरोहर’ र ‘प्रेमपत्र’
-
गीत संग्रह: ‘सयपत्री’ र ‘कब–कब’
-
गीत-गजल संग्रह: ‘कागजके फुल’ र ‘हिरा मोती’
-
कथा संग्रह: ‘विकल्प’ र अन्य थुप्रै फुटकर रचनाहरू
साहित्य साधनाका अतिरिक्त उहाँले लामो समयसम्म बाँसबारीस्थित कमला रोलिङ मिल्समा कार्यरत रही सेवा गर्नुभएको थियो । उहाँको निधनले मैथिली साहित्यको क्षेत्रमा अपूरणीय क्षति पुगेको साहित्यकारहरूले बताएका छन् ।
